Prins Carnaval 2023 in ’t Jocus Riék: Prins Gijs I (Hendrikx) Adjudante Martijn Hendrikx en Sef Smeets!

Op d’n Hofbal goof Vors Joeccius XI gruuëts bekindheid aan Prins Carnaval 2023 in ’t Jocus Riék. Dao hebse de prins! Prins Gijs I (Hendrikx) Adjudante Martijn Hendrikx en Sef Smeets!

Prins Gijs I (Hendrikx) is 37 jaor en haet twië blaage Sjuul (9) en Nanne (8). Same mit vriendin Ellen geneete zeej van de moëie dinger die ‘t laeve bringk.

In ’t dageliks laeve is hae directeur/eigenaer van ’t Theaterhotel, Mr. Jigs en ’t Ald Weishoés. Alzoë eine bourgondische Hoëgheid dae gasvreejheid hoëg in ’t vaandel haet.

Auk op maatschappelik vlak is d’n Hoëgheid genne ônbedinke. Hae waas 7 jaor betrokke beej de Young Business Club van VVV, ‘t Toeristisch Platform Maasduinen/ Venlo, de Aspergerie, VVEV en 4 jaor veurzitter van ‘t MKB Noord Limburg en nog diverse initiatieve op maatschappelik gebied.

Vastelaovend viere duit hae ‘t leefste mit vrinde en bekind. As lid van vrindeklup de Pimpelaers moch hae zelfs de iërvolle funksie van Höfkeuning vervölle. Zoë kos hae alvas ein bietje oefene van alles waat um in zien regeerperiode as Jocusprins te wachte steit.

Adjudant 1 Martijn
Adjudant 1 Martijn Hendrikx is 43 jaor en de aldere (en zoë vindt hae zelf de verstendigere) broor van d’n Hoëgheid. Hae is getrouwd mit Marianne en hebbe same 4 blaag Sophie (19), Stan (16), Floris (16) en Jesper (14).

Nao eine werkzame start beej Lagotronics in Venlo is hae noow al ein aantal jaor algemein directeur van SLV Nederland, gespecialiseerd in verleechting. Hae umschriéf zichzelf as eine verbinder dae ‘t opbouwe en innovere zeker neet vraemp is.

Net wie zien broor Prins Gijs I zit auk Martijn ’t sociaal-maatschappelik laeve in ’t blood: “Ik bin eine sociaal bewaoge man. Gaer zet ik mich in veur de samelaeving, waobeej minse mien biézôndere aandach hebbe. Beejveurbeeld as bestuurslid van de VVV Foundation en de Raod van Advies van ‘t Zomerparkfees. Sportief kin ik mien energie kwiët mit golf en mit hardlaupe.

Adjudant II Sef

Adjudant II Sef Smeets is 37 jaor en woënt same mit vriendin Jeanine. As jong oét de binnestad en kleinzoon van ald-Prins Jan III oét 1966 ging hae naor de Martinusschoël.

Nao ziene schoëltiéd volgde ein carriére in de Venlose horeca. In 2016 woort hae door beste vrind en Hoëgheid Gijs gevraog as operationeel manager beej ‘t Theaterhotel. Same hebbe zeej gewerk aan ’t kônsep en realisatie van Mr. Jigs. Auk same woort ’t nieje oétdagende projek aangegaon mit ‘t Ald Weishoés. As meide eigenaer/directeur van ’t hotel en de horeca is hae sinds de äöpening in november dao dageliks te vinde. Same mit d’n Hoëgheid haop hae det ‘t Ald Weishoés weer ein laevendig middelpunt in hertje stad geit waere en vuuël vereiniginge dao eure waeg alweer gevonde hebbe of nog gaon vinde. Auk Jocus Toekôms is truukgekiërd op ‘t alde nes!