Op zondaag elf november velt um percies 11.11 oor ’t startschot veur ’t nieje vastelaovessezoen. Ein biézônder jaor, want dit jaor besteit Jocus maar leefs 16×11 jaor. Vors Joeccius XI, Roel Versleijen en Börgemeister Antoin Scholten losse de iërste kenônscheut, gevolg door Stadsprins Herm I en de Prinse van de wiékvereiniginge. ’t Fees rondum Elf van Elf is ein initiatief van Venloosch Vastelaoves Gezelschap Jocus en de Stichting Horeca Aldstad Venlo (SHAV).
Vanaaf 11 oor traejt veur ’t Venlose stadhoés eine bônte slinger van artieste op. Jocus Hofkepel biet ’t spits aaf. Daonaeve zien d’r maar leefs veer bands; Greun Graas, Van Gelder, Linke Mik en de Carnavalsband. Auk vuuël bekinde artieste oét de eige regio gaeve acte de présence wao-ônder de 4 winnende Jocus leedjes, de Herfshane, Gôlden hiëring, Joekskepel NUATH,Björn van Berkel, de Toddezek, Twië kier Twië, Christel en Quinn en Björn en Mieke. naeve livemeziék zien d’r auk optraejes van DJ Falco.
Op dezen daag wuurt auk de niejen Opstaeker geprissenteerd aan Börgemeister Scholten. D’n Opstaeker, dit jaor ôntworpe door beeldend kunstenaer Fons Schobbers oét Venlo, is ech ein verzamelaersobjek. Daonaeve wuurt de nieje Jocus CD as iërste oétgereik aan Hoëgheid Prins Herm I. Zoëwaal D’n Opstaeker as de nieje Jocus CD zien vanaaf 11 november te kaup
Naeve alle Venlose vastelaovesvereniginge en –gezelschappe zal ’t Boerebroédspaar, Niki Benders en Luuk van Gerwen, van ’t nieje Boerebroélofsgezelschap Perseniëlsvereniging Benders zich veurstelle aan de vastelaovesvierders. Neteurlik gadegeslage door ‘d’n Erme Tak van Festina Lente”, ’t gezelschap van aafgelaupe seizoen.
Elf van elf, dan kumpse toch zeker zelf!
Weej zeen ôs op de markt op Elf van Elf 2018 vanaaf 10.30 oor.
