Jocusmotto sezoen 2025-2026: Det wuurt lache

Op vastelaovesdinsdaag haet Venloosch Vastelaoves Gezelschap Jocus 't nieje motto veur de Vastelaovend 2026 bekind gemak.

't Motto is ein inspiratiebrôn veur leedjesschriévers, optochdeilnemers en alle vastelaovesvierders.

Mit vastelaovend zit de Venlonaer alle zörg 3 daag op ‘t kesje. In ‘t Stedje van Lol en Plezeer regeerd de lach. D’r wuurt gedans, gezônge en vergaete weej d’n dagelikse zörg door ôs te begaaje mit ‘t schoënste fees van ‘t jaor. De vastelaovesvierder kiék d’r ‘t ganse jaor nao oét. Lache is dan smeis ‘t beste middecién en weej kriége dao maar gen genôg van.

Zoëas Frans Boermans schreef in ‘t 2e koeplet van ‘Jocus Vitae Quod Sal Coenae’:
Men môt noëits euverdriéve            
Dus laef neet in mineur            
Want altiéd ernstig bliéve            
Vervaelt zoë op d’n deur            
Dus lache, danse, zinge            
Wuurt noëits genôg gedaon            
Um kraak en smaak te bringe            
Aan ‘t minselik bestaon  

 Mit vastelaovend Lache wuurt noëits genôg gedaon. Alzoë kump ‘t nieje motto veur de Vastelaovend good veur d’n daag: Det wuurt lache!