33 inzendinge veur Jocus Veurselectie

Foto: © Renier Linders, Jocus P&P kemissie.

Zaoterdaagnach 24 juli sloot de inzending veur de Veurselectie. Maar leefs 33 leedjes zien ingesteurd. Det zien 6 leedjes miër in vergeliék mit veurig jaor.

Onder de inzendinge zien maar leefs 20 debutante in zang, schriévers en kômponiste. Iets wao Roel Bisschops, veurzitter van Jocus Joekskemissie hiel tevreeje mei is: “Weej meuge gruuëts zien det zo’n hoëg aantal leedjes zich haet ingeschreve. Det guuëf auk aan wie ziër de vastelaovend laef en – juus in dezen tiéd – minse nao ’t kômmende vastelaoves-sezoen oétkiéke.”

Opvallend is ein aantal inzendinge van deilnemers die in aafgelaupe jaore beej De Hefshane hebbe meigedaon. Zeej waoge eur kanse noow op ’t groëte podium van Opus Jocus Leedjesaovend. Volges Bisschops staon alle seine op greun um de Leedjesaovend door te laote gaon: ” ’t Veurig jaor waas ein biézôndere editie wao Jocus op ’t letste moment haet môtte besloéte gen bezeukers toe te laote door de toenmaolige situatie. Op dit moment waere ein aantal meugelikhede oétgewerk, mit en zonder publiek. Miër informasie dao-euver volg wanniër det kin.”

Jocus Veurselectie wuurt gehalde op zaoterdaag 4 september. De 11 beste leedjes meuge door nao Opus Jocus Leedjesaovend. Deze wuurt gehalde op zaoterdaag 9 oktoëber in Theater de Maaspoort en is live te zeen op Umroop Venlo i.s.m. JocusTV.

Reacties