Vastelaovend 2021 zal d’r anders oetzeen as andere jaore. Weej hebbe te make met ‘n pandemie met enorme gevolge veur de gezóndheid van ós allemaol. ‘t Coronavirus kinne, wille en meuge weej neet negere. De gezóndheid van ós allemaol geit baove alles.
Op grónd heejvan hebbe weej as Bestuur van Vastelaovesgezelschap ‘de Wortelepin’ nao riep beraod beslaote um veur ‘t kómmende seizoen ‘ne aangepaste Vastelaovend in Bliërick te gaon bringe.
Waat hilt ‘ne aangepaste Vastelaovend dan in
D’r zal kómmend seizoen genne nieje Hoeëgheid zien, weej kinne ‘n hoeëglöstig Trio gen vastelaovesaktiviteite biede wao idder jaor ‘ne Prins en zien Adjudante nao oetkieke!
Traditionele aktiviteite zulle vervalle en wao meugelik anders waere ingevuld. Dink heejbeej aan ’t Swaree, Zittinge en Optochte. Same met ós Kemmissies, de Bliërickse vereiniginge, de Horeca en de euverheid gaon weej de kómmende waeke bekieke wie de Vastelaovend in Bliërick d’r oet kin gaon zeen.
Vastelaovend is klatergold en parelwien, effe alle zörge opzie zette en lekker ónbevange gezelligheid opzeuke en oetstraole. Same met ald en jónk, groeët en klein viere, praote, lache, danse en ‘n pilske drinke. Dit alles wuurt helaas beperk, maar same zien weej in staot um heej invulling aan te gaeve, zoedet de Vastelaovesgeis in Blierick blief bestaon en weej in aangepaste vorm kinne genete van dit fantastische cultuurfees.
