Roy Peeters prins van de Wortelpin

Vanaovend haet Vors Carotius VII tiedes ’n fantastisch aangekleid Swaree ‘t 71e trio van “de Wortelepin” oetgerope, te weite Prins Roy I (Peeters) en zien Adjudante Dennis (Hendricks) en Ronald (Saak).

Prins Roy is 45 jaor, hae is getrouwd met Susan en zeej hebbe twieë dochters Lara en Iva. ’t Gezin woeënt in Bliërick. Prins Roy is werkzaam as Accountant-Administratieconsulent beej Full Account. Hoeëgheid Roy haet twieë passies wie hae zelf zaet: voetballe en wielrenne. Daonaeve is hae ouk al jaore lid van de Raod van Elf van Vastelaovesgezelschap ‘de Wortelepin’.

Ziene Adjudant Dennis telt 41 lentes en hae is getrouwd met Gigi. Zeej hebbe ’n zoon dae luustert nao de prachtige naam Thiago. Ouk zeej woeëne in Bliërick. In ‘t dageliks laeve verdeent Adjudant Dennis de kost as senior storemanager beej werkgaever Coolblue. Zien groeëtste hobby en passie is voetballe.

Adjudant Ronald is 44 jaor, hae woeënt same met zien Ieke en de dochters Fenna, Fiene en Yfke in Holt Bliërick. Ronald is senior relatiemanager beej ABAB Adviseurs en Accountants waor hae bedrieve helpt met ‘n breije zakelike advisering. Hae investeert vuuel in ’t gezin maar as de tied ’t toeluuet zien hardloupe, skiën en zeile oetdaginge die hae gaer aangeit. Ouk is hae lid van de Raod van Elf van Vastelaovesgezelschap ‘de Wortelepin’.

Alle dreej zien zeej ónder mier lid van voetbalvereiniging SVB, maar zeker ouk van vrindeklub “Altiëd de Letste” die dit jaor veur d’n 22ste kier in de Groeëten Bliëricksen Optoch meidoon. Of ’t Trio dit jaor “Altiëd de Letste” zulle zien, det is de vraog, maar in d’n Optoch zien zeej det in idders geval waal.

Vastelaovendvierend Bliërick kin gerös zien, in Bliërick is ’n goje basis neergezat.

Prins Roy en zien Adjudante Dennis en Ronald vinde ’t ’n groeëte ier um dit jaor same veur te meuge gaon in de Bliërickse Vastelaovend onder ’t motto: “Laef d’n Daag!”.